上週台北之行，充滿感恩，亦學到教訓。

感恩能成行，因為好遲先去book package，今次係幫襯永安，唔錯。

感恩冇人因護照問題出唔到發，應該有好多人明我講緊乜…

感恩天氣轉涼，唔使熱死。但係卻因為落雨，所以打亂咗去近郊嘅景點嘅部署，影相嘅心情都差啲，不過仍感恩去到猴硐睇貓，去到竹子湖睇海芋，尤其感恩係尾二嗰日嘅天氣，成日都冇咩落過雨。

感恩Whatsapp有咗通話功能，同老婆喺旅程中互相聯絡方便咗，唔使吓吓計住電話費，因為出兩張無限上網卡就搞掂，雖然個功能時靈時不靈，都已經好好，尤其是有一次同老婆仔女喺捷運失散咗…台灣之星個plan幾抵玩，五日無限3G上網包50文通話費都係250台幣，二號航廈一落機就有counter。

感恩可以同冇見廿幾年嘅中學同學聚舊，真要多謝佢兩公婆嘅款待，如果唔係有佢哋安排，我哋自己係未必會走上台北101食嘢睇景，雖然亞仔都講過好想上去。

真係唔好信哂旅遊書，尤其係出版咗一年以上嘅，啲嘢話變就變，啲舖頭話執就執，其中一個最失望嘅就係亞女，買唔到心頭好嘅韓星潮物…

人去你又去嘅地方亦唔見得有幾好，好似上引水產咁，我同老婆就覺得唔抵食喇！

自己嘅經驗都唔可信，去到瑞芳搵晏食先知三年前幫襯過OK好食嗰間牛肉麵已變咗靈堂，招牌雖在，人面全非。

第一日晏晝四點零鐘，漫無目的咁走咗入臺博館嘅土銀展示館，竟然因為就來關門，可以免費入場，感恩。

人嘅嗅覺唔係好靈敏，但係呢個最原始嘅感觀，就令我哋第一晚食咗一餐超值嘅任食韓燒，除開竟然每位都唔使一百文港紙，感恩。

捷運松山同信義線開通咗，真係方便過以前好多。不過，我哋四個人，打的都唔算貴，仲要遇著幾個的士司機都幾好傾。

近年去咗幾次台北，搭咗都好幾次台鐵，都仲係覺得啲班次表好難明，而家好多條線都開通咗用到悠遊卡，就更加混亂，究竟係咪對號列車都照坐得，我都仲未搞得清楚。

計劃行程時，老婆已經話想去吓啲文青蒲點，老同學車咗我哋去松山文創園區，但係因為係平日，又係公假後，好多嘢都閂咗，唔係咁多嘢睇，但係感恩一對仔女竟然話嗰個好粗疏嘅咩「解密科技寶藏」展好玩。

今次都叫做去咗好多之前未去過嘅地方，其中有幾處都並非港人嘅遊玩熱點，除咗松山文創園區，仲有：凱達格蘭大道、二二八和平公園、大安森林公園、猴硐、五分舖、饒河街夜市、北投公園、地熱谷、竹子湖，都算係咁喇，真要感恩。

食方面，除咗頭先講第一晚食嗰餐任食韓燒（華斯達克廣場高麗園）外，桃園街趙記菜肉餛飩、猴硐貓村嘅賴在231、西門町附近嘅Nico燒肉冠軍，都好令人回味。

[fb_album id=”675275465935533″]

耶穌叫門徒開船渡海到外邦人之地格拉森，只為救贖一個被人棄絕的鬼附之人，旅程中的大風浪叫他們險死還生…

你我為人，在浩瀚的宇宙中何其渺小，直如微塵，天地的主，竟甘為救你我而降世、受死…

基督的愛，是什麼一回事？

你我或者都如那格拉森人一樣渴望跟主就此在一起，然而主卻差你我到自己的地方去宣講祂為你我作了多大的事。

香港市民，究竟同唔同意「一死亦唔益」去起三跑？

點解一味要保持咩競爭力？乜而家咁有競爭力，香港人好很幸福同快樂咩？而世界上冇咁具競爭力嘅地方嘅人係咪通通痛苦到要死先？一次又一次搬呢個完全唔係理由嘅理由出來合理化啲大白象工程，根本就係搵笨實。

好耐冇講過老掉牙嘅故事，又講吓先…

有個老人家戴緊一棚假牙，甩緊其中一隻，心裡頭成日覺得差緊啲，去搵牙醫想鑲過副新嘅。

個牙醫問佢其實副牙係咪用唔到？係咪食得佢好痛？會唔會食食吓甩出來？

佢諗吓又唔係喎。

個牙醫話，既然副牙仲好好食，做乜要為嗰一隻牙嘥差唔多成萬文去整過呢？整咗又冇保證一定好食咗。不如用嗰啲錢去買嘢食咪仲開心！

佢又諗吓諗吓…

究竟會真係開心咗，定係仍然覺得唔多妥，認為只係個牙醫怕麻煩，唔肯同佢鑲？

好視乎個老人家嘅心態，更加視乎個牙醫畀人嘅口碑同感覺，係咪信得過囉…

若說一個人很猶太，就是指那人很看錢，很孤寒。

猶太人懂得做生意，懂得計錢，或許這就是全球最有錢的人中有很多猶太裔人的原因。

馬太二十1-16耶穌所說那葡萄園工人的比喻中，清早雇來的工人可能覺得主人不公平，甚至是位孤寒的財主，很猶太，因為深覺主人搵了他們笨。

但耶穌比喻中這一批清早雇來的工人正是自義的猶太人，他們把救恩當成酬勞，跟主人計較，眼紅罪人或外邦人所得的竟跟自己一樣多。

或許，主是以猶太之道還施猶太之身。

要知道，若我們跟主斤斤計較，當主真要跟我們計算時，恐怕我們有大禍了。

上帝所召的不是「有早知，冇乞兒」的預言家，而是那些縱早知也願意跟眾人一齊做乞兒的先知。

我相信合一是大前題，也是目標，但往往分散才是適用的策略。有人錯將合一用作手段，那結果就是更大的撕裂。我是指著教會說的。

正常一個母親，在自己和幼小的女兒遭疑似ISIS級數的恐佈份子圍上來的時候，該有什麼反應？打開行李匣，與疑似恐佈份子攤牌，痛罵他們欺負你的女兒？抑或是為了保護女兒，趕快逃離現場？或許，根本沒有所謂恐怖份子。或許，那根本不是一個正常的母親。