「真」「正」嘅崇拜

過去嘅主日,禮頓道公理堂請得灣仔堂羅國柱宣教師蒞臨證道,謹節錄羅宣講道其中兩段如下:

「…如果我哋經常去理解信仰係就只係做一個好人嘅話,我哋會點樣理解青少年工作呢:帶啲青少年返來,好好地跟我呢一套,學去做個好人,我哋就會將一套嘅標準,扤落佢哋嘅模樣裡面,希望佢哋乖乖哋坐喺呢一度,接受教育。細蚊仔,返來兒童崇拜係好嘅;青少年,返吓青少年崇拜,都係好嘅;不過,當你出來做嘢嘅時候,唔該你返番去大堂崇拜啦,嗰個先至係真正嘅崇拜咁樣。我哋的確有好多嘅教會嘅習慣、好多嘅傳統,我哋要求年青人去遵守。某程度上,我哋係期望佢哋繼承我哋嘅衣缽,要求佢(哋)繼承我哋教會傳統。但係,昔日法利賽人,為咗堅持自己嘅傳統,而錯過咗耶穌基督嘅福音;今日我哋點樣去理解青少年嘅福音呢?…」

「…我教會有啲嘅長執,都係同年青人一齊玩嘅,同年青人一齊返崇拜,嗄,佢哋唔係返完早堂嘅時候返年青人崇拜喎,嗄,佢地淨係返青少年崇拜,同我哋一齊敬拜,一齊聽即係青少年同工嘅講道…」

喺公理堂推行按齡牧養之初,曾經聽過有人用以下呢個理由反對開多堂崇拜去遷就青少年:崇拜講道係在乎講者嘅宣講同會眾嘅順服,啱唔啱聽或者明唔明得哂唔係最重要,只要順服上帝嘅道就得嘞。但同一班人又用好似剛好相反嘅理由去要求服事兒童崇拜或青少年崇拜嘅導師要返多一堂成人崇拜喎:兒童崇拜或青少年崇拜嘅信息提供唔到足夠嘅牧養同就造。如此自相矛盾嘅理由,背後嘅心態係咩?哦,無他嘅,就係因為大堂嘅成人崇拜先至係「真」「正」嘅崇拜囉… 

正如羅宣所講,點解兒童崇拜同青少年崇拜冇大堂崇拜咁「真」或咁「正」,係因為有人好想將一套嘅標準,扤落班細嘅佢哋度,仲有好多教會嘅習慣、好多所謂嘅傳統(比如某啲人堅持嘅禮儀),要求班細嘅去遵守。有人會問話唔明點解教會會將大部份嘅人手(尤其係幹職同工)分派去大堂嘅成人崇拜幫手,唔通成人比兒童或者青少年更加唔識自己搞掂?又點解有人硬性要求服事兒童同青少年嘅導師,要喺兒童崇拜或青少年崇拜以外,去多一堂成人崇拜?冇嘢嘅,答案就係:咁咪可以令到做兒童或青少年崇拜嘅導師嘅門檻提高啲,咁自然就多啲人寧願去嗰個又「真」又「正」嘅成人崇拜幫手囉,仲可以陰乾埋你哋呢啲唔跟傳統另起爐灶嘅分齡崇拜添!聖經原則嘛,凡有的,還要加給他,沒有的,連他所有的也要奪過來嘛…

當然,我以上嘅所謂答案,可能過於陰謀論,未必係有關人士心裡嘅盤算,但客觀效果確是教會愈趨上肥下瘦兼重心傾斜失衡,呢個卻係不爭嘅事實。試問,如果作為主事或幫手嘅教會領袖或導師們,都唔當兒童或青少年崇拜係「真」「正」嘅崇拜,班細嘅又會點樣睇呢?豈不是更加唔覺得要認真咁去參與呢個次一等嘅崇拜?於是乎,兒童同青少年嘅崇拜成日都搞唔起,永遠都唔夠「真」同「正」。

發佈留言

發佈留言必須填寫的電子郵件地址不會公開。 必填欄位標示為 *