《今4.25》

趕在今天寫好這詞,曲子已在腦中,容後加上。

曲、詞:海牛

今世易誤 此情莫變
回頭重選 不悔不怨
張眼日後 縱有煩愁
相依相眷 心中溫暖

今世易誤 此情莫變
求神憐恤 恩賜不斷
生有限壽 哪個先走
天邊稍等 相偕永恆

《地老天荒仍愛妳到底》

這一首挺肉麻的情歌,其實作了許久許久,比婚禮上唱的那首《愛中相依一生》更久,大概有二十年吧,因為我記得歌詞中那句「沒有誰人別個可取替」的意念是抄考自許志安那首《唯獨你是不可取替》的。

2015年將盡,我跟內子在一起到現在已過了四分之一個世紀,也是時候把這肉麻的歌寫在譜上了。

曲、詞:海牛

有著妳多麼精彩
每一天都多麼可愛
在昨天今日與未來
我愛妳從不變改

妳像曙光清新空氣
送我溫暖賜我生機
現我終於領會當中真理
我是天生愛定妳

我願意傾出一切
愛著妳一生一世
沒有誰人別個可取替
地老天荒仍愛妳到底

我共妳天生一對
決意一世與妳相許
為妳依戀愛慕傾心痴醉
更願一生醉下去

我願意傾出一切
愛著妳一生一世
沒有誰人別個可取替
地老天荒仍愛妳到底

《全是我錯》

記憶中,這歌是在十幾年前的某天跟老婆吵了一場架後寫的,跟我作的其他歌曲的旋律風格迥異。今次將它化成樂譜配上和弦,是我這個只懂小半桶水樂理的人的一次白痴的嘗試。

曲、詞:海牛

白天工作 夜間洗熨
有米懶煮 冇覺好瞓
沒有湯水滋潤
沒有早餐醒神
沒有妳的人生
如殭屍在遊魂

全是我錯 常犯過錯
令妳心深感激憤
在某日夜深悴然離去
剩下我一個人

現我空屋中空等
共那攬枕擁吻
回味過去每晚
妳在懷裡將肌膚貼緊

為甚我這麼失敗
沒勇氣再次表態
承認過錯盼妳原諒我
雙方可和解

《念那天相許一生》

《愛中相依一生》是十多年前我為自己的婚禮寫的歌,昨日在用MuseScore為它製作音樂mp3時,忽然有所感觸,想給它配上另一套的歌詞,tempo也調得慢一點……若有天我比妳先走,就讓這歌也成為我跟妳的別話…

曲、詞:海牛

念那天相許一生到白頭
念那天相許一生到永久
望重逢天邊手挽手
在新天地裡再沒離愁愛歌不休

求主賜福孤身的你
如始終跟我沒分離
任這生多波折 路縱崎嶇多變
願你得主勵勉休傷悲

求主賜福孤身的你
如始終跟我於一起
後半生的日期 願有主保守你
直到天家內再可緊擁你

Amen Amen
Amen Amen

天河彼岸

圖片

天河的彼岸,您可在窺看?

Seacow(@seacownet)張貼的相片 於 張貼

父子

圖片

父子是怎樣的一回事?

Seacow(@seacownet)張貼的相片 於 張貼

台北之旅後記

上週台北之行,充滿感恩,亦學到教訓。

感恩能成行,因為好遲先去book package,今次係幫襯永安,唔錯。

感恩冇人因護照問題出唔到發,應該有好多人明我講緊乜…

感恩天氣轉涼,唔使熱死。但係卻因為落雨,所以打亂咗去近郊嘅景點嘅部署,影相嘅心情都差啲,不過仍感恩去到猴硐睇貓,去到竹子湖睇海芋,尤其感恩係尾二嗰日嘅天氣,成日都冇咩落過雨。

感恩Whatsapp有咗通話功能,同老婆喺旅程中互相聯絡方便咗,唔使吓吓計住電話費,因為出兩張無限上網卡就搞掂,雖然個功能時靈時不靈,都已經好好,尤其是有一次同老婆仔女喺捷運失散咗…台灣之星個plan幾抵玩,五日無限3G上網包50文通話費都係250台幣,二號航廈一落機就有counter。

感恩可以同冇見廿幾年嘅中學同學聚舊,真要多謝佢兩公婆嘅款待,如果唔係有佢哋安排,我哋自己係未必會走上台北101食嘢睇景,雖然亞仔都講過好想上去。

真係唔好信哂旅遊書,尤其係出版咗一年以上嘅,啲嘢話變就變,啲舖頭話執就執,其中一個最失望嘅就係亞女,買唔到心頭好嘅韓星潮物…

人去你又去嘅地方亦唔見得有幾好,好似上引水產咁,我同老婆就覺得唔抵食喇!

自己嘅經驗都唔可信,去到瑞芳搵晏食先知三年前幫襯過OK好食嗰間牛肉麵已變咗靈堂,招牌雖在,人面全非。

第一日晏晝四點零鐘,漫無目的咁走咗入臺博館嘅土銀展示館,竟然因為就來關門,可以免費入場,感恩。

人嘅嗅覺唔係好靈敏,但係呢個最原始嘅感觀,就令我哋第一晚食咗一餐超值嘅任食韓燒,除開竟然每位都唔使一百文港紙,感恩。

捷運松山同信義線開通咗,真係方便過以前好多。不過,我哋四個人,打的都唔算貴,仲要遇著幾個的士司機都幾好傾。

近年去咗幾次台北,搭咗都好幾次台鐵,都仲係覺得啲班次表好難明,而家好多條線都開通咗用到悠遊卡,就更加混亂,究竟係咪對號列車都照坐得,我都仲未搞得清楚。

計劃行程時,老婆已經話想去吓啲文青蒲點,老同學車咗我哋去松山文創園區,但係因為係平日,又係公假後,好多嘢都閂咗,唔係咁多嘢睇,但係感恩一對仔女竟然話嗰個好粗疏嘅咩「解密科技寶藏」展好玩。

今次都叫做去咗好多之前未去過嘅地方,其中有幾處都並非港人嘅遊玩熱點,除咗松山文創園區,仲有:凱達格蘭大道、二二八和平公園、大安森林公園、猴硐、五分舖、饒河街夜市、北投公園、地熱谷、竹子湖,都算係咁喇,真要感恩。

食方面,除咗頭先講第一晚食嗰餐任食韓燒(華斯達克廣場高麗園)外,桃園街趙記菜肉餛飩、猴硐貓村嘅賴在231、西門町附近嘅Nico燒肉冠軍,都好令人回味。

[fb_album id="675275465935533″]

清明

默然垂首對山墳
追憶故人幾斷魂
嘆問天家何日往
舉頭遙望見愁雲

律敦治

今晚重訪舊地,百感交集;看著老人的臉,憶起兒時種種,眼眶不禁濕了。

《愛中相依一生》

這是十五年前為自己的婚禮寫的歌,這個三月內,教會中連續幾個星期都有數對弟兄姊妹舉行婚禮,奈何因工作關係,一概未能出席到賀,特復記這歌歌詞於此,聊表祝福。

曲、詞:海牛

願愛中相依一生到白頭
願愛中相牽一世到永久
願能從今起手挽手
任天荒地老短或長壽都相守

求主賜福這對佳偶
能彼此委身沒保留
任這生多波折 路縱崎嶇多變
仍願彼此互勉相分憂

求主賜福這對佳偶
能彼此體恤心相剖
用愛心相寬恕 用信心多禱告
朝著天家路向相偕走

Amen Amen
Amen Amen